Segja má að öflun upplýsinga og söfnun gagna sé tvenns konar:

1. Eftirlit, gagnaskráning og túlkun um það sem fram fer í rannsókninni (t.d. skólastofunni) þar sem atferlið sjálft er skoðað og skráð.

2. Eftirlit, gagnaskráning og túlkun um það nám sem fram fer hjá rannsakandanum sjálfum (kennaranum). Það sem rannsakandinn upplifir og lærir á því að gera starfendarannsóknina.

Skráning á því sem fram fer í skólastofunni

Eftirlit og skráning snýst um að skoða það sem er að gerast, t.d. í skólastofunni. Hafðu í huga að rannsóknarefnið ert þú og það eru þínar gjörðir sem þarf að skoða. Mundu einnig að þú ert í tengslum við nemendur og markmiðið með rannsókninni er að auka nám nemendanna. Þú þarft því að skoða þitt atferli og samskipti þín við nemendur og hvernig þér tekst að auka áhuga og virkja nemendur til eigin náms.

Svara þarf spurningum um:
1. Hver sér um eftirlitið? (þú einn, þú og nemendur þínir, utanaðkomandi aðili)
2. Hvað er skoðað? (hæfileiki þinn til samskipta við nemendur, hvernig þér tekst að virkja nemendur)
3. Hvernig fer eftirlitið fram? (skrifaðar glósur, hljóðupptökur, myndbandsupptökur, viðtöl)

Mikilvægt er að skoða og safna gögnum um ástandið í byrjun rannsóknar. Þau gögn eru síðan borin saman við niðurstöðugögnin. Nota þarf ólík gögn í rannsókninni t.d. dagbækur, minnismiða, hljóð- og myndbandsupptökur, myndir, viðhorfalista, kannanir/próf, spurningalista, viðtöl o.fl.

Skráning á eigin námi og upplifun

Þegar rannsakandi skoðar og skráir eigin upplifun og nám í rannsókn sinni er best að vera með einskonar dagbók og skrá hjá sér hugleiðingar, atvik og sjálfsgagnrýni. Með sjálfsgagnrýni er átt við að þú spyrjir þig spurninga um hvers vegna þú sagðir hitt eða þetta eða hvers vegna þú gerðir hlutina svona ekki öðruvísi. Að þú veltir t.d. fyrir þér hvernig þú orðar hlutina eða hvort að þú komir öðruvísi fram við stelpur en stráka.

Skráning á eigin námi getur eingöngu farið fram hjá rannsakandanum sjálfum. Það á ekki við að annar aðili skoði hvernig þú upplifir rannsóknina eða hvernig hugsun þín breytist þegar líður á rannsóknina.

Að skrá hjá sér eigið nám byggir á að rannsakandi velti fyrir sér spurningum eins og:

Skráning gagna um eigið nám getur falið í sér athugun á hegðun/atferli, skoðun á myndbandi af kennslunni þinni, samtölum við aðra, minnispunktum meðan á kennslu stendur, bréfum eða tölvupósti til samstarfsaðila eða skráningu í eigin dagbók.

Gott er að fá aðra til að fara yfir gögnin og fá álit annarra.