Þrátt fyrir að starfendarannsókn sé fyrst og fremst fyrir rannsakandann sjálfan þá getur verið gagnlegt fyrir aðra að nýta sér niðurstöðurnar. Þegar niðurstöður rannsóknar liggja fyrir getur kennarinn/rannsakandinn komið þeim á framfæri með ýmsum hætti. Til dæmis með því að kynna þær á kennarafundi í skólanum eða í öðrum skólum. Einnig á ráðstefnum eða á málstofum hjá skólafólki.

Ein leið til þess að kynna niðurstöður er að birta stuttar sögur út kennslunni á kennarasöguvefnum þar sem aðrir geta lesið og fræðst um það sem vel er gert í skólastarfi. Sögurnar þurfa ekki að vera langar eða fræðilegar heldur er megintilgangurinn að segja frá reynslu úr kennslu þar sem kennarinn hefur prófað nýja hluti með góðum árangri.

Til að birta sögu á kennarasöguvefnum þarf ekki liggja fyrir ítarleg rannsókn á viðfangsefninu heldur er markmiðið að koma á framfæri jákvæðum breytingum úr kennslu og skólastarfi, breytingum sem hafa gefið góða raun og stuðlað að bættu skólastarfi. Þessar sögur þurfa ekki að vera langar eða ítarlegar en þar þarf að koma fram um hvers konar vandamál var að etja, hvað var gert og hvernig gekk. Hér er hægt að nálgast eyðublað sem gott er að styðjast við áður en sagan er sett á vefinn.