Brugðið á leik með efni úr eddukvæðum.

Efni: Helga kviða Hundingsbana
Lengd: u.þ.b. 60 mínútur

• Kennari kynnir nemendum lauslega efni kviðunnar með því að fara í gegnum helstu efnisatriði á glærum og staldra við hápunkta kvæðisins.
• Nemendum er skipt niður í 4 hópa sem eiga að fara nánar í saumana á efnisatriðum með því að endursegja með eigin orðum ákveðna hluta úr kviðunni, styðjast við kennslubókina og endursögn kennarans.

Efnishlutarnir sem hóparnir endursegja eru þessir:

• (Hópur 1) Sigrún hittir Helga fyrst og þau verða ástfangin
• (Hópur 2) Helgi berst við ættingja Sigrúnar
• (Hópur 3) Dagur hefnir sín
• ( Hópur 4) Sigrún hittir Helga í haugnum

• Kennari safnar endursögnum saman og dreifir næst litlum miðum á alla hópana. Hver nemandi skrifar eina setningu á miðann samkvæmt eftirfarandi fyrirmælum:

Nemendur í hópi 1 skrifa eldheita ástarjátningu konu til karlmanns
Nemendur í hópi 2 skrifa eldheita ástarjátning karlmanns til konu
Nemendur í hópi 3 skrifa setningu sem lýsir sorg konu sem hefur misst ástmann sinn
Nemendur í hópi 4 skrifa setningu þar sem kona skammar bróður sinn fyrir að myrða ástmann hennar og aðra setningu þar sem sami bróðir biðst vægðar.

• Kennari safnar miðunum saman í umslög sem eru vel merkt
• Nemendur setjast í hring og leikurinn hefst fyrir alvöru með því að nemendur lýsa efni kvæðisins með því að lesa upp endursagnirnar en kennari stoppar á viðeigandi stöðum og lætur nemendur draga miðana sem nemendur höfðu skrifað ýmsar setningar á og lesa upp eftir því hvað á við hverju sinni. Kennari ræður hraðanum en hann þarf að vera innlifaður í framvinduna, tengja á milli, leyfa nemendum að draga oft miða og hætta ekki fyrr en farið hefur verið í gengum alla frásögnina.

Þetta var fyrst reynt í kennslustund þann 10. apríl 2008 hjá 2. D og gafst mjög vel.
Nemendur skemmtu sér vel yfir þessu og  kennari ekki síður.

PS. Nokkrum vikum áður en þessi leikur fór fram hafði kennari beðið nemendur um að lýsa uppáhalds hetjunum sem þeir áttu sem börn. Þær upplýsingar voru geymdar og nýttar í leiknum þar sem kennari var með lýsingar nemenda á hetjum sínum í umslagi og dró þær fram á réttum augnablikum og skaut inn í leikinn til frekari skemmtunar.
Dæmi: ,,Þegar Sigrún sá Helga fyrst fannst henni hann líta út alveg eins og....(nemandi dregur miða upp úr umslagi merktu ,,karlhetjur nemenda”) ,,Batman/hann var hugrakkur, átti flottan bíl sem spúði eldi þegar hann gaf í og var hraðskreiður og brynvarinn....”